నాన్న కోసం...

ప్రపంచం పరిచయమయ్యే క్రమాన తనే నా తొలినేస్తం...
సంతోషం తో ఉప్పొంగిపోయేదా హృదయం...నా చిన్ని విజయానికి సైతం!!!

తొలి అడుగులు వేసేప్పుడు తన అడుగులే నాకాదర్శం....
నా ప్రతి అడుగు తీరం చేరాలన్నదే తన ఆరాటం!!!

ఆకలి నిండిన కడుపును నే చూడకూడదన్నది తన ఉద్దేశ్యం...
ఎరుగనైతి, నా ఆకలికై తను అనుభవించు కష్టాల సందేశం!!!

ఓటమెదురైన ప్రతి సారీ నన్నాదరించినదా హస్తం...
వెన్ను తట్టి ప్రోత్సహించి చేసిందీ, విజయపు దిశానిర్దేశం!!!

నే దారి తప్పినప్పుడే, తడి రుచి చూసే తొలిసారి ఆ నయనం....
మరువలేనూ, నా మార్గం మార్చేందుకు తన గమ్యం వదిలేసిన వైనం!!!

ఇరుకైన దోవల్లో నన్నెత్తుకుని కొనసాగించెను తన పయనం....
తడబడు ప్రతి అడుగుకూ బదులిచ్చు తన నైజం, నింపిందీ నాలో ఆత్మవిశ్వాసం!!!

తనకు కొడుకును చేసి, అడగకనే ఇచ్చెను ఆ దైవం నాకీవరం...
జన్మంతా అర్పించినా తీరేనా నన్నీ స్థాయికి చేర్చిన తండ్రి రుణం!!!

లోకం ఎరిగినంతలో తండ్రి హృదయం పాషాణం....
లోకులు ఎరుగరైతిరో ఎమో సమస్త నదుల జన్మ స్థానం!!!

పది మాసాలే మోయు కడుపున బిడ్డను ఏ తల్లైనా...
ఆ కొద్ది సేపే అనుభవించు తల్లి, ఎంతటి పురిటి కష్టమైన!!!
ఎదిగేంత వరకూ మోసేను తండ్రి తన భుజముల పైన...
భరించు ఎదురుదెబ్బలు తన గుండె మాటున, ఎదిగే ప్రతి సందర్భం లోనా!!!

కష్టాల్, నష్టాల్,.......

కష్టాల్, నష్టాల్, వుంటాయ్....ఈ బతుకు బండి కుదుపులలో...
కోపాల్, తాపాల్, కలుగుతయ్ .... అనుకున్నవి జరగని సమయాలలో...
బాధల్,భయాల్, కమ్ముతాయ్.... ఓటములే ఎదురౌతున్న వేళల్లో...
నిరాశల్, నిస్పృహల్, చేరుతాయ్.... ఒంటరిగా మిగిలిపొయిన సందర్భంలో...

పైవే నిత్యం, సత్యం లా కనిపిస్తయ్....
కన్నీటిని ధారలుగా మార్చేస్తయ్...
పక్క వాని పై నిప్పులు కురిపిస్తయ్...
చీకటిలోనే వుండిపోతామనిపిస్తయ్...
అర్థంలేని బ్రతుకుని ఇలా యెన్నేళ్ళో గడిపేస్తయ్...
నవ్వేందుకు అందులో ఆస్కారమే లేదనిపిస్తయ్...!!!

పువ్వు రాలిన కొమ్మలనలేదు ఇదే శాస్వతమని...
మసకబారిన సూర్యుడనలేదు ఇంతే తన బ్రతుకని...
రాహువు మింగినా చంద్రుడొప్పలేదు ఇక తను లేనని..
ఒడ్డు కాదన్నా అలలాపేనా సముద్రంతో తమ పోరుని...
ఏదీ కలిసి రాకున్నా ఆపవచ్చునా ఈ జీవన ధారనీ... !!!

నా మది లో గల ఈ భావాలు

నా మది లో గల ఈ భావాలు... పంచుకోవాలనుకున్నా.....తన తో కలిసి చేసిన ప్రయణం లో....చెప్పేందుకు అప్పుడు ధైర్యం లేదు....దాన్ని తలచుకునేందుకు ఇప్పుడు తీరిక లేదు!!!


నీ పలుకుల పల్లవి నింగిని చేరగ...
తొలకరి జల్లై నువు నేలకు జారగ...
ప్రకృతి కాంత పులకింతల్లో మొగ్గలు వేసే...
నీ...నా చెలిమి సంకేతంగా!!!
పచ్చని వెన్నెల నిండుగ కాచే...
మన ఆనందాలే ఆమని కాగా!!!

నిత్యం రగిలే రవి నేనైనా...
దారే తెలియని...నిశి లో చేరి...శశి గా మారి...
నీ ముంగిట వాలి...
దినముకు కరుగుతూ....క్షణములో పెరుగుతూ!!!

తెగబడు అడుగులు....... పాదములాపగ!!!
తడబడు మాటలు....పెదవులు దాటక!!!
ఎగబడు ఆత్రం......... గుండెను తాకగ!!!
భాషను మరిచీ భావం....మూగైపోగా.....

నా ఎదలో వ్యధలు నీతో పంచే పథమేది..?
నీ మది లో కథలు నాకే తెలిసే విధమేది...?

వదిలేయకు...నిస్పృహకు...

ఆశయ శిఖరారోహణ లో తడబాటు సహజం...
తడిమి చూసుకో అప్పుడు నీ యెద లోతుల్లోని స్వప్నం....
కనబడలేదా అక్కడ వేళ్ళూనిన లక్ష్యపు వృక్షం...
కస్టాన్నే ప్రేమిస్తే కన్నీరైనా కాదా కలల సాధన కు మార్గం....

సంకల్పం....

గురువు లేని బోయ కి...గురి నేర్పింది ఎవ్వరు...
గగనగంగను ఇల దించిన భగీరథుని బలమెవ్వరు..
సుధ సాధన లో సురల పక్షాన ధైర్యమెవ్వరు...
కడ దాకా సాగే కఠోర శ్రమకి సారథెవ్వరు !!!

కలవారందరు నీకు లేని వారౌతున్నా..
కల్లో కూడ రాని వారౌతున్నా...
కల్లోలం చుట్టుముడుతున్నా...
కాంతి రేఖ కనబడకున్నా...
కడలి అడుగున నీ కోరిక సమాధి అవుతున్నా.....
కలతలతో కృంగిపోకు నా నేస్తమా... కలల తీరం చేర్చేది....నీ సంకల్పమే సుమా...!!!

ఎవరో ఒకరు...ఎపుడో అపుడు....

ఎవరో ఒకరు... ఎపుడో అపుడు
నడవరా ముందుగా అటో ఇటో ఎటో వైపు
అటో ఇటో ఎటో వైపు......

మొదటి వాడు ఎప్పుడూ ఒక్కడే మరి
మొదటి అడుగు ఎప్పుడూ ఒంటరే మరి
వెనుక వచ్చు వాళ్ళకు బాట అయినది ..

ఎవరో ఒకరు... ఎపుడో అపుడు
నడవరా ముందుగా అటో ఇటో ఎటో వైపు
అటో ఇటో ఎటో వైపు

కదలరు ఎవ్వరూ వేకువ వచ్చినా అనుకొని కోడి కూత నిదరపోదుగా.. జగతికి మేలుకొలుపు మానుకోదుగా..
మొదటి చినుకు సూటిగా దూకి రానిదే మబ్బు కొంగు చాటుగా ఒదిగి దాగితే.. వాన ధార రాదుగా నేల దారికి ప్రాణమంటు లేదుగా బ్రతకటానికి..

ఎవరో ఒకరు... ఎపుడో అపుడు
నడవరా ముందుగా అటో ఇటో ఎటో వైపు
అటో ఇటో ఎటో వైపు

చెదరక పోదుగా చిక్కని చీకటి మిణుగురు రెక్క చాటు చిన్ని కాంతికి..దానికి లెక్క లేదు కాళరాతిరి..
పెదవి ప్రమిద నిలపని నవ్వు జ్యోతిని రెప్ప వెనక ఆపని కంటి నీటిని సాగలేక ఆగితే దారి తరుగునా? జాలి చూపి తీరమే దరికి చేరునా..?

ఎవరో ఒకరు... ఎపుడో అపుడు
నడవరా ముందుగా అటో ఇటో ఎటో వైపు
అటో ఇటో ఎటో వైపు

యుగములు సాగిన నింగిని తాకక ఎగసిన అలల ఆశ అలసిపోదుగా ఓటమి ఒప్పుకుంటూ ఆగిపోదుగా
ఎంత వేడి ఎండకే ఒళ్ళు మండితే.. అంత వాడి ఆవిరై వెళ్ళి చేరదా
అంత గొప్ప సూర్యుడు కళ్ళు మూయడా?.. నల్ల మబ్బు కమ్మితే చల్లబడడా..?

ఎవరో ఒకరు... ఎపుడో అపుడు
నడవరా ముందుగా అటో ఇటో ఎటో వైపు
అటో ఇటో ఎటో వైపు

ఎంత గొప్పదీ నా జాతి! ఎంత ఘనమో తన సంస్కృతి!!

ఎంత గొప్పదీ నా జాతి!
ఎంత ఘనమో తన సంస్కృతి!!
ధర్మ మార్గాన్నే జీవించమన్నది!
తనకు మించిన ధర్మం కూడదన్నది!!

కర్మ వరకే నీ హక్కన్నది!
కర్మఫలం వదిలేయమన్నది!!

పరోపకారార్థమే ఈ శరీరమన్నదీ!
ప్రాణులంతా సమమన్నది!!

ఎంత గొప్పదీ నా జాతి!
ఎంత ఘనమో తన సంస్కృతి!!
అర్థము కొరకే జీవించుట వ్యర్థమన్నది!
అర్థవంతమైన సంఘం కోరమన్నది!!

పెద్దల యెడ గౌరవం ఉంచమన్నది!
ఆ గుణమే నీ ఆత్మగౌరవం పెంచునన్నది!!

కనీ, పెంచే దైవాలను పూజించమన్నదీ!
కనిపించని దైవానికి అది అందునన్నది!!

ఎంత గొప్పదీ నా జాతి!
ఎంత ఘనమో తన సంస్కృతి!!
దైవం వేరెచటో లేదన్నది !
నీలోని దైవాన్ని వెతకమన్నది !!

శరణంటే శతృవునైనా క్షమించమన్నది !
నీలోని శతృవులపై కినుకు వహించకన్నది!!


ఏకపత్నీ వ్రతం గొప్పదని చాటి చెప్పినదీ!
కర్తవ్య నిర్వహణ లో ఆ బంధాన్ని సైతం విడువమన్నది!!

సత్యమే జయించునన్నదీ!
అసత్య విజయం జరుగదన్నది!!

లోకులంతా సోదరులై మెలగాలని కోరుకున్నదీ!!
కనుకే, జగతికే నా జాతి ఆదర్శవంతమైనది!!!