Saturday, January 1, 2011

నిన్నటి తరం.....

తరమెళ్ళిపోతోంది...
గురుతర బాధ్యతలు మ పై వదిలి...
తాతల తరం తరలెళ్ళిపోతోంది...

ఉప్పెక్కించుకున్న వీపు విశ్రాంతి కోరింది...
లోకాన్ని చూపించిన వేలు ఇక కనిపించనంది...
కలల అలల పై ఆడించు ఒడి కాలక్రీడకు ఓడిపోయింది...
కథల తోటి మా వ్యథలు తీర్చిన మాట మూగబోయింది..!!!
తరమెళ్ళిపోతోంది...
తాతల తరం తరలెళ్ళిపోతోంది...
రేపటిని మాకిచ్చి నేటికి నిన్నలా మిగిలిపోతోంది...!!!


స్నేహ శీలతే సంపద గా..
మానవీయతే మన్నన గా...
నమ్మిన విలువలే వెల లేని సిరి గా...
నమ్ముకున్న వారి ఆదరణే తన విధిగా...!!!
నడయాడిన ఓతరం
తమ జాడలు మాకై వదిలి...
ఇక శెలవంటూ వెళ్లిపోతోంది...కాల గతి లో మళ్ళిపోతోంది..!!


కడగండ్లకు తల వంచని మనోస్థైర్యమే శ్వాసగ...
భేషజమెరుగని బోసినవ్వులే తన బాష గా...
ప్రతిదినమున అగుపించే సూర్యోదయమే తన ఆశగా...
పరోపకరమే పెన్నిధిగా...పరమానందమే పరమావధిగా...!!!!
బ్రతికిన ఆ తరమెళ్ళిపోతోంది...
మా తప్పులను సరిచేయు అనుభవాల తరువు తరిగిపోతోంది...!!!